La Liberazion global dal moeud de pensà mafios

Milano, 23  aprile 2017 -

Con questo racconto Roberto Brivio, il Cantamacabro dei Gufi, chitarra, fisarmonica e voce del mitico gruppo dialettal-cabarettistico che animava la Milano degli anni ’60, inizia una collaborazione col Giorno. Ogni settimana il suo sguardo affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

Voeuri minga  vess giudicà ignorant ma me domandi cossa voeur dì Liberazion. Sì, quella della fineguerra, liberazion dai todesch. Me recordi che s’eri sfollàa in on paes del Friùl, visin al Tagliament, in doe imperversava la Tot, doe gh’eren in partigian che se nascondeven de per tutt e saltaven foeura cont i fusil e i mitra quand men te l’aspettavet. I tedesch gh’haveven paura de trovaj su la strada perché come lor faseven minga tanti compliment, sparaven. Me recordi ona SS che l’era vegnuda in del cortil a vardà sospettosamente la colonna del camin che la partiva dal “fogolar” e vegnend foeura in moradora la rivava fina al tecc. L’ha comincià a mett denter ‘na cana e a rugà, poeu minga content l’ha brusà paja e fen sec per fa andà su el fumm e soffegà chi pensava che ghe fuss sconduu, poeu ancamò, ciappà da la furia assassina l’ha comincià a sparà su per la cana cont el risultà de tirà giò on pivion. Me recordi che numm fioeu giogavom con i armi de legn (pistol, fusil, pugnai, spad). Me recordi quand on aereo l’è burlà in di camp colpì dalla contraerea. La mia mama la me tegneva per man nell’unica ca’ che la gh’haveva il soffit intonacà (gh’hoo ancamò de capì perché se rifugiavom tucc lì). Al bòtt seguì a l’agonia de la discesa, hoo sentìi el so’sang ch’el se scontrava cont el me. Ona sensazion , anca se la mamma l’è morta da dersett ann, che senti ammò adess ai bòtt fort. Se dormiva mal in quel temp. Con Pippo ch’el passava de nott, cont i aerei che se sbassaven per mitraglià, con la gent che la scappava in di camp, che la dormiva in di stall, che l’andava in di rifugi formà da ona grossa busa scavada in de l’ort e quattada da ona piramid de fassin de legna,

Gh'era nell'ort de la mia nonna ‘na foppa, on meter de diametro, quatter o cinq de profondità, in doe se nascondeva la primula rossa del paes. Nissun doveva savè chi l’era. Nissun doveva vedè la soa faccia. Inscì, vegnend foeura de nott el podeva andà a liberà i contadin presonnier e in procinto de vess portà in di camp de concentrament. Voeuri no tirà a man la liberazion da questa schiavitù, anca se me recordi benissim i carr armàa di american quand hinn entrà in paes, con i donn in torretta. Quei donn che per la gioia avarissen premià i liberador anca col corp. E i Militar che sbatteven giò tavolett de ciccolatt, su no se gomm de mastegà o de fàa i ballon ( me par che quej sien vegnu pussè avanti, on para de ann dopo). Numm fioeu coi gamb fassà per i piagh (on’infezion che la pareva lebbra) cont su l’ittiolo, che la mattina de bonora se lavaven in l’acqua correnta del fium, allora minga inquinàa, el dì’ stess andavom per i camp, armi de legn a la man, a cercà tedesch che aveven fa’ minga in temp a scappà. Situazion pericolosa, ma dighela ai fioeu che aveven in ment domà de diventà partigian.

Voeuri no parlàa de questa liberazion, anca se recordi quand el me papà el me portava in centro a Milan (serom tornà quasi subit) a sentì i discors del Nenni e del Togliatti e a dì: “cramanto, questi si’ che hinn omen!” la liberazion che intendi mi l’è quella global. La liberazion di lader ch’han fàa della bella Italia on paes retrogrado, cont on’unica cultura: i danè. La liberazion dagli alti stipendi che ingrossen el debit pubblic, la liberazion de la cultura, dall’ignoranza, dai mafi e ‘ndranghet, dal moeud de pensà mafios, da “lei non sa chi sono io”, dall’incertezza del doman, dal cont in banca semper ross, dal dovè a tutti i cost consummà perché gh’è tanta de quella roba che l’è on peccàa lassala sui banc, dal cercà tutti i mattin quaicoss de fà per sbarcà el lunari, dal sentì i tg che parlen de corruzion, de politich che van minga ben, de sopraffazion, egoism, razzism, cagàa che ghe metten su la tavola tucc i moment a travers el video, vacad che fann passà per roba intellettual, fals in tutti i camp, dalla medesina alla matematica, dalla scola doe gh’hin insegnant che san no insegnà, ai asili doe i responsabil picchen i fioeu per faj sta’ quiett.

E basta con sti pont che van giò. Hinn fàa de paja? Che basta on loff quasiasi ch’el buffa per fai crollà sui macchin, che passen ignare? Resten in pe’ domà i pont di fest. Quej crollen no. Quej stan su. Del rest le diseva anca al me amis Giorgio Zennaro “ credo che se dovesse grandinare sarebbe preferibile prenderla piuttosto che ripararsi sotto un ponte che decisamente fa’ più male dei chicchi gelati anche se grossi.” “mi a credi che se dovess tempestà el saria mej ciappala in sul co’ puttòst che trovà ripar sotta on pont che crolland el fa pussè mal de ‘na tempesta gelada”.

brivio.roberto@yahoo.it