El coeur grand de la periferia

Milano, 18 febbraio 2018  -

Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

Giuri che quand hoo scritt l’articol che l’è stà pubblicaa Giovedì quindes Febrar l’era no success tutt quel gibilèe che l’ha occupà i pagin di giornaj. L’incendi a Quarto Oggiaro che quaivun ha localizzaa come l’estrema periferia de Milan, anca se l’è vera, anca se l’è on quarter difficil, proeuva a dill ai so’ abitant che le difenden come se fodessen cà, strad, piazz, palazz, giardin, costruì de lor. Come hoo giamò ditt nell’articol de on quaj mes fa, hoo cantà e recità insema a Grazia Maria Raimondi, a Villa Scheibler e depoeu ho seguì i organizzator, quej de la Noesis, in doa aveven allestì on rinfresch. Parlaven del quarter, le difendeven, le trattaven cone ona entità viva, piena de energia, de voeuja de fa, de inseriss, de mett insema dolor e gioia, nequizi e bontà, brutalità e mitezza, ferocia e bonarietà, bruttezz e bellezz, indifferenza e umanità, atrocità e bej maner. Inscì, al par de la città, la periferia la gh’ha i so’ delinquent e la soa bòna gent, i malvivent e quij ch’hinn rispettos de la legg. E quanto ai furti, roben a Quarto Oggiaro come roben in Centro, in la cerchia di Navili. Periferii? certo! Ma se te gh’et de andà a “sonà l’orghen” te devet andà a Bagg, se te voeuret vedè i Teater de Villa Clerici te devet andà a Niguarda, se te devet sfogass al pattinoire covert ghe n’è vun a Lorentegg, al giardin dedicaa a la Merini a Sest ciamada ona volta la Stalingrado d’Italia e perfin ona cà mortuaria. L’han missa in via Corelli, passà el pont de la tangenzial, pussè in là de la veggia Osteria dell’Oppio, dopo l’Ortiga che ona volta l’era sperduda e cont ona letteratura de malavita che te la raccomandi.

Donca, tutt quest per dì che i quarter de ‘sta città metropolitana a eren ciamà zonn, depoeu circoscrizion, e adess pomposament Municipi. Mi el so’ perchè l’han faa, oltre che copial de Roma, perché gh’eren di moviment che voeureven fa’ tornà certi quarter (Lambrà, Greco, Niguarda, Precott ecc. ) Comun. Inscì gh’han dà el contentin e s’hinn trà foeura di pè i facinoros che voeureven ancamò i Comun per regolà mej la vita, i scoll, i strad, semper per el benesser di… governant (dis la gent che la gh’ha no i problemm di politicant e la vorariss on po’ men de burocrazia e ona presenza attiva de la città). Numm de spettacol e dell’art, attor, cantant, pittor, scoltor, danzator, musicist, regist, circens, scrittor, semm semper a disposizion e squas semper a gratis. Parli de tanti che gh’hann el nomm, de tanti che s’hinn faa desmentegà, tanti che la gent ricorda ancamò cont affett e teneressa perché con lor hann passàa “i migliori anni della loro vita”, tanti che laoren (i giovin) per fass esperienza, per scriv nel curriculum (incoeu necessari come el pan) “Ho laorà cont quell e quell’alter, e quell’alter ancamò”. Gratis anca se poeu el Comun o chi per lù el scrittura le cosìddette “vedette” compensandoi cont quel che voeuren anca se esorbitant. E allora per collegamm cont l’inizi dell’articol, voraria famm perdonà se hoo trascurà propri questi notizi che compensen i cruzzi de tutti i dì e parlen de la part bòna e minga semper de quella disperada. Mi hoo comincià el me tirocinio nel secol passaa propri cont questi spettacol. L’era ona compagnia formada da Mino Reitano, Liliana Feldmann, Evelina Sironi, Mario De Angeli, che la girava i ca’ de ripos de Milan e Provincia. Depoeu gh’è stada on’altra compagnia trada in pè dal scior Petessi, ciamada la Volante del Sorriso, cont Gino Bramieri per portabandera, mi, Grazia Maria Raimondi, tenor, soprani, Roberto Negri al piano e on quaj attor. Adess da tanti ann, Renato Dal Compare, presidente de i Donatori di Sangue del Sacco e Uniti, el mett insema artist vecc e noeuf per portà el sorris ai anzian, sann e malaa, minga domà del Sacco, ma anca di alter Istituzion.

Incoeu, ai quindes, al Pio Albergo Trivulzio, on temp ciamà Baggina, giust perché l’era e l’è arent a Bagg, nel salon central, gh’è ona manifestazion spettacolar cont i artisti de la memoria, che a hinn ancamò in gamba e che regalen canzon e recitazion di lor repertori conossù e amaa da tucc (pazient e parent… che rima eh?, anca se al post di parent a volt a gh’hinn i serpent). Inscì, ghe sarann (in ordin alfabetich): Roberto Brivio, Cesare Cadeo, Renato Dal Compare, Wilma De Angelis, il Mago Max, Grazia Maria Raimondi, I Viganò Brothers, Daniele Violi, Elisabetta Viviani, tucc filmaa dal Guido Veronesi, insema al direttor general del Pio Albergo Trivulzio, consideraa la Limousine di Hotel Geriatrich: Claudio Sileo. Cossa cantarann i artist nominàa se sa, el lor repertori straconossù. Mi e la Raimondi cantarem on risott de ritornej che van da Eulalia Torricelli ai cadetti di Guascogna, dai Pompieri di Viggiù a Arrivano i nostri a cavallo di un caval, da Evviva la torre di Pisa a Han rubato il Duomo, da Il Cucciolo (de grand attualità dal moment che i biciclett elettrich a hinn tornà de moda) a La Gagarella del Biffi Scala, da Nostalgia de Milan a Oh mia Bella Madonnina. Canterann tucc, podi sottoscrivell. L’è propri al Trivulzio che hoo sentì quej veggett cuntà su storiell de ridd come “ Uei, quand te fet l’amor te parlet cont la toa miè?” “ Se la me telefona, sì.” - “Uei te troeuvi in forma. Cossa te faa, Te gh’heet anca ti 85, me par:” “ Eh, per viv san e scampà vecc ghe voeur tanta pappa, poca pipa e niente peppa:” - “I giovin vorarissen vess fedej, ma hinn minga bon.” “ I vecc vorarissen vess infedej, ma poden no.” - “ Pierino chi ha suonato?” “ Un signore che voleva qualcosa per il ricovero dei vecchi” “ e tu cosa gli hai dato? “ “la nonna!”- I bambino “Mamma come sono nato io?” “ Ti ha portato un’aquila” II bambino “E io, mamma, come sono nato?” “ Ti ha portato un corvo.” III bambino “E io come sono nato mamma?” “ Ti ha portato la cicogna” La nonna, smettendo di lavorare a maglia “ L’avevi dit mi che i trii fioeu vegniven da trii usei different!”. brivio.roberto@yahoo.it