"H’ottanta voglia di vivere". Idea per on spettacolo al Dal Verme

Milano, 25 maggio 2017 - Con questo racconto Roberto Brivio, il Cantamacabro dei Gufi, chitarra, fisarmonica e voce del mitico gruppo dialettal-cabarettistico che animava la Milano degli anni ’60, inizia una collaborazione col Giorno. Ogni settimana il suo sguardo affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

“Donà al sang l’è minga ona roba de tutti” la diseva ‘na sciora davanti alla roulotte in doe faseven la raccolta per strada. Infatti l’è cert che su cent che le donen quand gh’hinn i campagn per cattà su sang, ghe sarà ona bona percentual de scart. Perché? Per donall gh’è semper quell che le fa anca s’el sa ch’el sang l’è minga bon per via del diabete o de alter malatti che le renden incompatibil. Te donnet el sang ed ecco che salten foeura robb che nanca te pensavet de portass in corp. E allora ? Allora ecco che la raccolta del sang la se organizza in di ospedal. El sang l’arriva cont el so’ donator, nel senso che donn e omen qualificàa lassen giò periodicament el sang. In ‘sti cas gh’è voeur on quaivun che i organizza, i e tenn insema, i e coordina. Mi l’hoo conossù quand ancamò gestivi el Refettorio, on cabaret in pieno centro de Milan. El se ciama Renato de cognom Dal Compare. A l’è on capp, on dirigent, on President. Adess l’è al Sacco che ona volta el se ciamava “de Vialba”, ma l’è partì dall’Istituto dei Tumori in doe l’è stàa ann e ann.

Oltre a coordinà i donator, a cercai, a fa’ i campagn anca pubblicitari come el tram de quest’inverno ch’el girava per la città cont ona imbarcada de artist per sensibilizà la popolazion a corr per donà el sang, el Renatino, come le ciamen i amis, organizza spettacol per i malàa. El scrittura, gratis et amore dei, attor e cantant de nomm, quei che hinn, malgrado l’età, ancamò su la cresta dell’onda, o quei che la gent la po’ no desmentegàa, e cont lor el mett su spettacol frequentàa sora tutt dai malàa che gh’han minga voeuia de ridd e invece se troeuven a fall e a la fin disen de ave’ ridu volentera, che han sentì canzon che avarien mai pensàa de ascoltà direttament da la boca de quei che hii han lanciàa o scritt. Resten senza fiàà nell’incontrà certi protagonist come Tony Dallara, Alberto Anelli, Memo Remigi, Wilma De Angelis, Packy dei Nuovi Angeli, Gian Pierretti, Enrico Beruschi, Elisabetta Viviani, mi insema alla Grazia Maria Raimondi, e quanti alter te ne podet mett… metij. Fàa el spettacol, ona mangiada e salut fin a la prossima. Me piasaria cuntav ona storia: protagonisti mi, la Raimondi e Dal Compare. Se conosseven da fioeu. Gh’era stà mai nient fra lor. Quand sont rivà mi! L’era el ’71, gestivi el Refettorio, on cabaret in via San Maurilio. I Gufi s’eran lassà in del ’69 a teater esaurii. A part i desideri de vegnì foeura personalment e minga in grupp, hoo ancamo’ de capill. Beh, cognossi la Raimondi, e decidom in d’on bott de mettes insema e de formà ona famiglia. El Renato l’è restà m’è on sass. So no s’el gh’aveva intenzion ma magari on pensèe ghe l’aveva in co’ e lu le saveva nanca. Insomma parla, discutt, scherza, el m’ha faà scriv che se on doman avarissum spaccàa el soldalizi el saria stàa el primm omm a fass avant. Uei, hinn passàa 47 ann de allora e se per cas o per fortuna o per volontà de Dio rivassom ai cent la Raimondi, 107 mi, e succedess l’rreparabil, e la miè la restass sola, voraria vedè cossa el podarà fàa. E allora el se contenta de ciamala “la mia miè”, no, no la mia, la soa!

Se parla tant de “certi moment” e guarda cas capiten ai amis che t’è stimà per la vita. Esempi el Daniele Piombi. Andà via d’on boff, dopo on para d’an de sofferenz ma semper cont la speranza de vegnin foeura. Gh’hoo on rimpiant vers el Daniele. Quell de minga ave savu che l’era all’ospedal e ch’el stava mal. Hoo minga fàa a temp andà a trovall. Ma sont andàa al funeral. Gh’era gent, sì, ma tutti i artist che lu l’aveva premiàa, tutti quei che eren stà lancià dai so’ premi, dai so’ spettacol, tutti i so amis che hann ridu cont lu, ciamà a destra o a sinistra a fàa partecipazion, doe eren? Hoo vist semper num. Remigi, Dal Compare, Anelli, on quaj alter, mi la Raimondi, la Maria Alberta Viviani, ex Rai, Barbara Fiorini, Ranuccio Bastoni. Superstiti? Macchè, fedeli. Se sa. In certi occasion se tiren a ment i ricord. El mè l’è fresc, de quand Daniele el gh’aveva 31 o 32 ann. El premi de la Regia Televisiva l’era al quint ann. I Gufi eren appena nassù e faseven spettacol in di teater con el grand impresari Remigio Paone. Me se ferma la macchina visin a Reggio Emilia. Carro attrezzi, officina, savevi no se fa, dopo. La macchina de ritirà l’indoman. Ciami el Piombi. S’erom mai frequentàa ma el so numer me l’aveva dà Carlo Cattaneo amis de pell che on quaj ann dopo el sposarà la donna de la soa vita: Lina Volonghi. Dapprima on po’ sconcertàa ma dopo, tanto rassicurant, el giovin presentator e venn a toemm, per portamm all’Astoria, l’hotel in doe organizzava serad, per invidamm a cena a ca’ soa coi so’ e per sta’ cont mi fin quasi la mattina. Me desmentegaroo mai, e ghe l’hoo semper dit, de quell’intervent a vun che el conosseva appena per sentito dire. Dopo, quand i Gufi, eren finìi, dal ’69, hoo laorà cont lu a Telesanterno, a Catania, in Puglia, in alter TV privàa, gh’era Christian, la Raimondi cont l’Operetta, giornalist che partiven da Milan. L’hoo saludaa per l’ultima volta, e hoo saludàa Mirella, la soa miè. Che tristezza vedè i amis andà via. La nota positiva de la giornada l’è stada cont Memo Remigi. Gh’hoo dit che l’ann che ven, compissom tucc e du ’80 ann. Anziché fàa el solit rinfresc, el sarià bel fàa on spettacol mi e lu al Dal Verme. L’ha trovàa subit el titol: H’ottanta voglia di vivere.

brivio.roberto@yahoo.it