Foto dal ’40 a incoeu Vegia o noeuva città piena de sorpres

Milano, 25 giugno 2017 - I settimanal, per certi vers, hinn bon per cognoss l’età di attor, di politich mas’c e femmin, di personagg televisiv e cinematografic, per vede’ i lorfoto e capì se l’identità l’è anmo’ quella pubblicada o se l’è de on quaj ann fàa, insomma hinn minga stampà per fa’ notizia, ma per soddisfà i oeucc di guardon che voeuren vedè i possessor di ciav del paradis che hinn la notorietà, i danèe, i debit (tanti debit tanto onor) specialment quej vers la società rappresentada in costum, sui barc ciamà yoch (se pronuncia inscì), ai defilèe, nei ristorant a la moda, sul tappee (carpet) ross, cont vestìi a la barbona (casual), con vestìi elegant (semper a la barbona ma pussè raffinada), i donn biott a fa vedè dal bamborin in giò a volt el triangol, la spaccadura del de drè (poster), e sora el stomich i do pronunciament semperpronunciàa sia che caschen vers i genoeucc, sia che resten drizz ma che vosen“uei, baloss, deghi on’ogiada… eh? Fa’ balà l’oeucc”.

I giornaii invece fan notizia.Gh’hann on mucc de pagin. Impienii el dev’vess minga facil. Sì, d’accord, gh’hinn i agenzii, te devet scernì, cattà, toeu foeura, de devet fàa i titol che sien bon de ciamài oggiad di lettor, mett i foto, fàa i sottitol, ma l’è on gran laorà. E gh’è minga tanto temp a disposizion. Quand comincen a laorà tiren fina el dì che vegn; quand te comperet el giornal te legget, dopo la cronaca, i robb che a tutta prima te colpissen. Esempi l’è quella de la via Strozzi leggiuda su on giornal web, quell che se ved sulcomputer: “Via Strozzi verso la prima scuola in legno per la fine del 20/8/2017”. Uei, ona scola in legn come la “casetta in Canadà con tanti fiori di lillà”. Ma rivom minga tardi? E gh’è minga la protezion di foreste (foreste minga forester)? Ma el legn, l’è minga pericolos? El po’ incendiass, e semm adrè a vedè, foeugh su foeugh, quanti mort e ferii el fàa. Sarà senzalter on legn trattàa, misc’ià a on quaicos de ignifugo! Me ven in ment l’amianto. Che l’è cancerogeno. I trii porcellit s’eren costruì reciprocament ona cà de paja, ona ca’ de legn, ona cà in muradora. Quand l’è rivà el loff (lupo) l’ha dit : “…e mi te mollo un peto che te butto xo el caseto..” “mollane un, mollane do, la mia casa non la va xo”. L’è restada in pè quella in muradora. Buffa buffa el loff l’ha finì per spolmonass e per finì al P.S. (pronto soccorso – bollin verd) col pneumatorace. Chissà s’el andarà’ anca in via Strozzi. Chissà se la resisterà ai tempest, ai bomb (se dis inscì) d’acqua, ai tsunami creà dai fioeu che hinn minga semper compost come se ved in di film american, cont la maestrina giovina che la se troeuva semper class educàa, cont al massimo on fioeuribell che magari el gh’ha el papà cioccaton, la mader indaffarada, e l’è salvàa dal professor de ginnastica (scienze motorie) che contra tucc el ghe insegna come se viv civilment.

Altra notizia, alter regal. Al circol cultural Milano, largo Corsia dei servi 4, gh’è ona mostra cont foto dal 1940 a incoeu (77ann) El particolar l’è che se tratta de foto de Milan, vegia e noeuva. Sperem che ghe faghen vedè el gran cambiament che l’è adrè a fa’ ‘sta metropoli ammirada da tucc. L’è ona città misteriosa, piena de sorpres: el biscion ciamà Tarantasio che l’è diventà lo stemma ufficiale cont i facc anca su “le vedovelle”, i fontanell in doe se bevacqua bona, la roeda de sang in Santo Steven, el diavol che se incornasu la colonna a Sant Amboeus, la dama nera che abita nel parc del Sempion, el vampir de la stazion central, i miracol a Milan del pret de Ratanà, el lac sotta al Castel…” ghe n’è per el mond. intèr. El cuntava l’ editor Paolo Dossola, minga milanes, ma innamora’ de la citta’ al punto che l’ha pubblicaa cont i so’ “Edizioni Meneghine Meravigli” ona stravacada de liber su la città vista in bici, in auto, in tram, a pè, sul Navili, la Martesana, dal Domm, dal Pirellon, sotta terra, in tram, in motorin, insomma el diseva che el professor, giornalista, Tito Livraghi, l’ha scritt on liber intitolà “Il romanzo di Milano” cont ona storia piena de fantasia poetica. I càa de via Borgonuovo che parlen tra lor attravers i fogn. 500 ann passaa tra intrigh, moment de pas, affann, fina ai filastrocch di fioeu che giogaven in di cortill. “Don Don/Cecch Maron/Ciocca de festa/Pan in canesta/ vin in vassel/ciappa che l’è bell.” On tal Cecch Maron, diventà scior, el voeureva mett davanti al so nomm el Don nobilesc. El troeuva ona tosa dal sang bleu, la sposa e …ball, fest, zen, vestii, scarp… in pocch temp l’è in miseria. “Cicca Berlicca/ la forca t’impicca/ Leon…speron… col rest/ indovina se l’è quest.” Cicca l’era on personagg del temp di Viscont. Seduttor de ‘na tosetta l’è fidà a on gioin de stalla che le ciama “cicca” (rimastico del tabacco). Mis in convent l’incendia e poeu el scappa domà cont ona forca tatuada sul brasc. Brigant, avventurier, crosà in Palestina, sbattuu in galera, el scappa con l’aiut. del diavol (Berlicca); ciappà ancamò l’hann impiccàa per scambi de persona in piazza Fontana. Prima l’aveva perdu ona gamba. Subit sostituida cont vuna de legn. El Papa l’aveva onorà cont i speron d’or per el so’ gran coragg in Palestina. Ma el podeva minga portai ai cavigg per i menomazion e allora i e portava al coll. L’è inscì che l’è nassù l’Ordin del “Speron d’or”. Cicca, leon, forca, speron, manca el rest. Forsi el rest l’era el condensà de la soa vida.

brivio.roberto@yahoo.it