Basta guardà Italia e pension e ghè minga bisognn de inventà altri barzellett

La vita l’è on calambor: bisogna savé ridd de on disaster

Prove di sorriso

Prove di sorriso

Milano, 19 novembre 2017 - Hoo ricevu tanti letter, o mej, tanti mail, per l’articol de martedì 14 Novembre. In tutti me se domandava in doa hoo trovà quii calambour (a la francesa e “calambor”a la milanesa, dato che la o la se legg u) pubblicaa nell’ultim “me sbalordissi”. Per ragion de spazi hoo minga citaa el liber “Meglio bastardi che mai dal diario di un cane…sporcaccione” di Roberto Brivio e Augusto Mazzotti, ediz. Williams. Tutt in regola. I gh’èmm inventà in duu, ma in ogni pagina hoo segnalaa umoristicament l’autor. Esempi: da le dialogues de un Carmelitain senza calzett (scalzo) “ Formaggio reverendo? – Si, grazie, formaggino Pio” “Padre, ho rubato un amplificatore – Si, figliolo, quanti volts?” “Al Monte di Pietà: Quanto mi dà per questo vassorio? – Mille lire – Vi abbiamo presentato un cabaret impegnato” “L’Alto Adige guardava con malcelato disprezzo la Bassa Padana”. I edizion Williams a gh’hinn pu, quindi semm in regola cont tutt. Quasi quasi m’el ristampi de per mi e le metti su Facebook. Lassi perd el termine “sporcaccione” miss dall’editor perché second lu el faseva balà l’oeucc di guardoni. Ma el liber gh’aveva nient de guardà, l’era scritt domà per leggel. E nel legg salten foeura ‘sti frasi che gh’èmm dit per ann derbend la strada a tutti quej ch’hinn vegnù depeu.  Semm staa i primm a scriv demenzialità come questi che me sont premuraa de voltà in milanes “L’altra sira San Gioann el m’ha portà l’Apocalisse. L’hoo leggiuda. L’era la fin del mond!” “ Minga tutti san che la prima gara de fioretto a squadre l’ha vinciuda Francesco d’Assisi” “Depeu la visita al salon internazional di servizi igienich: Veni, Vidi, Wici.” “In considerazion del gran numer de aborti che se verifichen in Italia, se po’ dì, ribaltand un antigh moeud , che i verz nassen sora i fioeu” “ L’ insista no, sciora, il Guglielmo Tell l’è no on albergo”. Questa l’hann copiada e voltada in mila version. A Gh’hinn in gir i trader di battud. Ne fann on commercio, le metten su uattsapp e te le troeuvet smistaa nanca duu minut depeu l’ invenzion. Viaggen cont i Tav, se spanteghen per i città ad ogni stazion, sembren el vortice di Des Comandament: “cossa l’è quella spiral che la se moeuv come on serpent?” “L’è ona tromba de barzellett. Attent perché se la te invest a la prima occasion ti e sparet foeura a mitraglia” “Mej. Inscì saroo ciamà el spirit de la compagnia. Faroo ridd tucc. Me invidaran ai zen. Diventaroo ona vedette. Me ciamaran in television a fa l’opinionist. A mi la tromba di barzellett. Me la giri al coll, ai gamb. Me la foo penetrà nel cervell. Adess che sont pien de barzellett, de battud, de calambor, de demenzialità, podi affrontà el mond.  Cominci cont el salott de la sciora Pasetti. Bongiorno sciora Pasetti. Me sont squass invidà perché voeuri fagh vedè come sont brillant. La sa quella… e quella… e quella…e quel… ma com’è che ridd nissun. Sont entrà ne la tromba, no? Ridd el dovaress vess automatic!” “ scior…come el se ciama…” “Pistolati.” “Ecco, scior Pistolati… che la guarda. Se le ciami mi la gent la ridd. I barzellett bisogna savè contaj!” Ueilla riessi minga a fermamm. Me vegnen in ment voeuna dopo l’altra. I lacrim del Buffon. San Siro a lus smorzaa in lutto. La gent nanca incassada ma squass liberada dall’ossession de dovè vinc, de cor a ca’ per vedè la partida, de vosà quand el ballon l’è in su la corsa dell’Immobile che ‘sta volta l’è staa propri come el so nomm. A hinn tutti ciappà a cercà scus, a volè riformà el calcio, a trancià giudizi negativ, a vess espert, a ragionà de verticalizzazion, de arretrament, de gioegh d’ala, de picchiate senza virà, e pocch disen che per duu temp la famigerata squadra che l’ha perdu la qualificazion l’è stada squas semper nell’area di avversari, avversari che han tirà minga domà calcioni sui schinca (stinchi). La Nilsen la dovaria cuntà i colp ai cavilli, ai brasc, i spinton, i sgambett. Per mi a hinn 1 all’Italia e 10 a la Svezia).

Hann cercà de faa foeura i giogador nazional cont perfidia e calcol. Nissun l’ha rimarcaa che i noster han sbagliàa almen cinq volt tirand el baloon foeura del camp invece che in porta. Ona maggior precision e gh’avarissem insaccaa almen tri gol. A la prima partida han faa ona pirlada. Adess parlen tucc de disfatta, de tombolada. Italia precipitada in bass. Minga per l’esclusion ai mondial! Se la gh’avess segnàa on gol eren giamò pront i titol: grande impresa degli azzurri, onore al C.T., il Presidente premia sul campo i calciatori con la legion d’onore, la massima onorificenza francese(riconoscimento europeo sul campo), gli eroi di San Siro…ecc ecc.  Altra barzelletta l’è quella di pension. El Governo el dis de sì, la Camusso la dis de no, la Cisl apre, Gentiloni mette sul piatto 300 milioni, l’Inps ha accolto per l’Ape 300 richieste... di miele, la Soce Sismet la voeur portà i ghiaccioli in Groenlandia. El laourà el gh’è, el personal giust no, e la Clicca Lavoro la scriv che a Milan a gh’hinn circa 1801 richieste. La scriv da almen on ann! Possibil che in on ann el vun di 1801 el sia minga stà assunto? Bersani el dis: A hinn tucc ciaccer! E l’indica no la soluzion. A proposit de ciaccer me ven in ment la barzelletta de quel pader ch’el rientra a ca’ dopo i do e troeuva la soa tosa de vint ann a giogà cont on v.... “Tosa” la ghe dis “ Mi a la toa età battevi la cavallina, surrogati … nisba”. “tas, papà. Incoeu, t’el legget, di omen se po pù fidass. In doa vu a cercan voeun? In discoteca? E cossa te porti a cà, on malàa, on depravaa, on drogaa, on lader? No lassa perd. Mej el vibrator. Quell, podi minga accusal de stolchi!” La sera dopo la va foeura la tosa. E quand la torna troeuva el papà in cusina settà giò davanti al tavol cont davanti mezz liter de vin, la radio e al centro el v.... “ Papà! Depeu la predica de ier sera! Ste fet?!” “ Tas, tosa, tas. On omm come mi che t’ha allevada, educada, istruida, senza ona mamma per guida, morta quand te set nassuda, adess che senti el bisogn d’ona donna in doa voo a trovalla? In discoteca? E chi te porti a cà ona malada, ona depravada, ona drogada, ona ladra? No te ghet reson ti. Mej stà in cà mia. La mia bella radio, mezz liter de vin, quatter ciaccer col me gener…!

brivio.roberto@yahoo.it

è arrivato su WhatsApp

Per ricevere le notizie selezionate dalla redazione in modo semplice e sicuro