La television d’incoeu l’impulso alla cultura e... la solita resentada

Milano, 3 settembre 2017 - Con il suo sguardo affilato in decenni di satira, esercitata come attore, scrittore e chansonnier, Brivio illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese

Sta volta toccca a la television di stato in tutti i so canal, 1,2,3, e a quei commercial che van per la maggior 4, 5, italia 1, e ancamò La7, canai 8 e 9, Iris, Movie, Rai premium,Cielo, Rai4, Rai 5, La 5 e per chi voeur metten di alter la pagina a l’è averta. Ogni ann i offizi Stampa di television sparapanzen sui giornai, a volt gratis, a volt a pagament, i palinsest de la stagion televisiva che stà per arrivà. Prima comincen a tirà a man i necessità de dagh impulso alla cultura, peu affermen de abbandonà el programma de l’ann passàa perché ormai l’è vecc (incoeu se dis obsoleto mentre mi adottaria un’espression in voga per i cà che hinn a la fin: fatiscente). Quand un programm l’è trii ann ch’el va in onda, Sacerdote e Falqui insegnen, el dev cambià, specialmente se i puntat hin 30/40 nell’ann, minga i vott o i dodes canonic de ’na volta. Se propri te voeuret ammortizzà cost che ogni ann aumenten, cambiagh el nomm! El presentador, pardon, conduttore (come el maneta del tram)! La cosidetta filosofia, che la gh’è mai! 

I comic! Quest le sarà difficil perché incoeu de comic ghe n’è no all’altezza de quei del secol passàa, ti e vedet anca nel techetechettè che l’era el programma pussè intelligent e quest’ ann el rovinen perché tutti i puntad sembren monografie de cantant. Anca lor stufissen, a la fin di cùnt. L’idea che piaseva a tucc e che tegneva in pè el programma cont grand interess l’era el frazionament di numer, di canzon e la brevità. El Sketc l’era minga dà per inter, e insci’ la canzon. Lassaven la voeuja, costruiven la speranza de sentì la fin all’indoman. Adess ne manden in onda duu, trii. Te fan vegnì ona barba. Peu el riva el Walter Chiari, el Bramieri, tacchen a cuntà ona barzelletta e ghe la lassen nanca finì. El personagg pussè comic in television l’è el Paolo Panelli. Le manden in onda cont parsimonia. E si che de robb ne ha fàa. Al montagg ghe voeur no domà el tecnic o el regista de turno, ghe voeur anca on autor ch’el gh’abbia l’ingegn de costruì on varietà cont i registràa, minga on esposizion de canzon. Ma la reson de ’sto articol l’è on altra. Voeri minga disperd la fantasia in critich che tucc i teleascoltador fann, scriven in di sòcial e malgrado el numer de reclam, i dirigent dei vari television van avanti imperterriti a fa’ quell che voeuren lor. Perché? Per perd no el post. A deven andà a drè a l’onda della pubblicità. Ona roba la funziona? La se programma per ann, altrimenti el sponsor el va via. Ma mi me domandi, el sponsor, che a volt el se legg nanca, tanta l’è la velocità che hann nel fa passà el rullo, cossa ghe frega a lu de quell che fann? Ah, l’audience. Ma l’audience l’è ona roba fittizia. Mi comperi on giornal per legg la classifica di programm. A volt la fa’ ridd. 4557, se tratta de milion. Ma i sett d’in doa salten foeura. La stessa sera a la stessa ora on alter programma el fa 6512, un olter ancamò 3723, e peu 2115 e 2113 e 2112…= 21,132, Come l’è possibil se in tutta Italia, quella sera a quell’ora alter statistic disen che i telespettatori sono stati in tutto 13.216? Certo che se ri’sciassen pussè cont programma e personagg divers magari podarien trovass el stess numer de appassionàa. No. E pazienza se tutt quell che ripeten ogni ann fudess passabil, a part l’incensament dei settimanai, ma manden in onda certi vaccad pubblicizzàa con prepotenza de immagin, de cartellon stradal, de recension squasi semper favorevol, che, mi scommetti, chi le stà a guardà el fa come mi, segutà a fa scattà el telecomand per vedè se gh’è quaicoss de pussè interessant. Ona sera la trasmissione de Alberto Angela l’è andada ai stell. Che soddisfazion. Peu han comincià a criticall, perfina el Piero so pader l’era no content. Me sembra de vardà alla lontana ona tana de invidios che se fann la forca per imponn roba de scart, cont pocca ideazion. 

E adess parlemm di personagg. Ne hoo trovà tanti ai funeral de Nanni Svampa. Se ved che ona cerimonia laica sul lagh maggior (Portovaltravaglia) l’ha attirà verament tanta gent. El primm che ho incontrà l’è stà Renato Pozzetto. El ferma la macchina, ciao Roberto, ho dato un saluto a NanniCiao. Ciao. E dopo pocch a pocch hinn rivà da Milan, L’Oreglio, el Faini, Visentin, Michele de Gino e Michele che l’ha comincià a fàa el cabaret in on grupp ch’el se ciamava i Bachi da sera, Maciachini, Salvi, Pellicini, la Raimondi, la Vajani, Caliari, Enzo Jacchetti, Jenky, Piccardi, Patrucco, Maria Brivio, i Du Perdu, i Barlafus e alter che hoo minga vist. Grande festa cont i canzon de Nanni cantà in del giardin de la soa cà, corteo fina al lagh, quatter paroll e peu ognidun a cà soa compres la miè Dina, i tosann Elena e Lidia e le nipotine. Personagg che podarissen avegh on spazi a la Rai per ona trasmission de cabaret minga a la manera de Zelig, o de Colorado o Made in Sud, ma noeuva anca nella movimentazion di attor e diversa ad ogni puntada. Invece van avanti cont roba veggia. Conti ch’el farà la Corrida, Lippi cont Tale e quale show, a La 7 Giletti el farà ancamò l’Arena, la De Filippi cont quatter varietà noeuv, disen: Amici, C’è posta per te, House party e Ultima fermata.I ultim duu sembren original ma quel che gh’è denter el gira semper sui so’ argoment. E depeu gh’è el Fazio con la Litizzetto che se spostaran a a RaiUno. La dann come ona gran novità ma el programma l’è semper quell “Che tempo che fa”. L’ error fa a posta el rend el titol pussè “variabil”. El Vespa semper in su la porta ch’el staga attent ai corrent d’aria de Montecitorio. E tutti i giornalist cont i trasmission de l’ann passàa. Ma sciao, Quej van semper ben.

L'è el varietà ch’el manca. Basta no segutà a fa i cantant, ghe voeuren, me ripeti, idee. Ah, pardon, vuna la gh’è. La Bebe Vio, campionessa de fiorett (20a) guidarà la trasmission su Rai 1 intitolada “La vita l’è ona figada”. Complimenti al funzionari Rai, al consili de amministrazion, a la presidenza che l’han accetada. I e vedi in offizi vardà cont diffidenza chi l’ha faa la proposta, consultass cont i capp immediatament superior che a lor volta cerchen el capp che stà sora de lor fina arrivà a la presidenza e magari al santo offizi. I e vedi ridd dal primm a l’ultim e annuncià all’ideator sbalordì …”El titol? Ona Figada!”. Ma mi che fina a ier hoo dit ai me nevodin che dì quella parola el sta’ minga ben cossa devi rispond quand me domandaran “Cosa vuol dire figata, nonno”? “Vulvòna?” “Vulvada?”